আবু তাহের তারেকের ‘আম্মা’ সিরিজের কয়েকটি কবিতা|290645|Desh Rupantor
logo
আপডেট : ১ মে, ২০২১ ১৩:২৭
আবু তাহের তারেকের ‘আম্মা’ সিরিজের কয়েকটি কবিতা

আবু তাহের তারেকের ‘আম্মা’ সিরিজের কয়েকটি কবিতা

আবু তাহের তারেক

আম্মারে লইইয়া যতইতি ইয়াদ

 

আম্মারে ফোন দিলে খান্দইন

তানরে ফোন না দিলে খান্দইন

আম্মারে লইয়া যতইতি ইয়াদ খান্দনে ভরা

 

আম্মা নদী

 

সবকিছু থাকি বার অইছি

বন্ধুত্ব নাশ অইল

পিরিত নাশ অইল

কামও ট্যাশ নায়

ভাই বইন ছাড়ছি

তান তান লগে কথা কওয়া ছাড়া দিন রাইত যায়

অনেক সমুন্দর গাং খাল হাকম পারইছি

আম্মারে পার অইতাম পাররাম না

আম্মা থাকি বারইছি

কিন্তুক তানরে ছাড়াইয়া যাইতে পাররাম কই

 

আম্মা মরতায় নায়

 

মরি যাওয়া মানে জামা খুলি লাওয়া

পোশাগর দায় কাইন্দ না

আম্মা মরতায় নায়

 

মা পাখি

 

মানুষ পাখির জবান বুঝে না

দাওয়াত খাইতে যায় না

খড়ের বাদায়

তারা কিচির মিচির করে

মা পাখি

ডালে ডালে ছয়র করে

 

লাইলাক

 

লাইলাক ফুটছে

একলা

হে কানতেছে

তার বাপ মায়ের লাগি?

 

ফুটতেছে

আরো কিছু ফুলের

মা বাপ হইবার দায়

 

আম্মা

 

আমার চামড়া দি তুমার লাগি শাড়ি বানাইতাম

আমার মাংশ দি তুমার লাগি মজার কাবাব বানাইতাম

আমার পিরিত দি তুমার বাসর সাজাইতাম

ফুল দি ফল দি হাজাইল ঘর

আমার লউ দি তুমার লাগি শরবত বানাইতাম

আমার মাথা দি তুমার পালকি বইতাম

আমার চুল দি তুমারে আড়াল করতাম

 

আম্মা তুমি শরমিন্দা অইও না

আম্মা গো তুমি দুক পাইও না

 

আম্মা আমি ফুল হইয়া ফল হইয়া তুমার পাতে

তুমার হাতে

তুমার কোলে থাকমু

 

তুমি আমারে ছাইড় না

 

আবু তাহের তারেকের বই: ফের্নান্দ পেসোয়ার নির্বাচিত কবিতা (অনুবাদ, ২০১৬), আইয়ো রেগো ময়না (কবিতা, ২০১৮) ও আম্মা নদী (প্রকাশিতব্য)।